SC judge-te lakah complaint theh lut

Karnataka sorkar hnenah a ṭhenawm state, Tamil Nadu tana Cauvery lui tui pe chhuak tura hriattirtu, Supreme Court judge pahnihte lakah complaint thehluh a ni.

SC judge pahnih, Dipak Misra leh U U Lalit awmna bench chuan Karnataka leh Tamil Nadu-te'n Cauvery lui tui an inchuh chungchang a ngaihtuah hnuah, kar kalta Thawhṭanni khan Karnataka state hnenah he lui tui hi Tamil Nadu tan ni 10 chhung, nitin cusecs 15,000 pe turin a hriattir a ni. Supreme Court thupek ang hian Karnataka sorkar hian Thawhlehni
aṭang khan lui tui hi a pe a, mahse an state chhung hmun hrang hrangah court thupek duh lohna lantir hian nawrh an huaihawt.

Kar kalta Inrinni khan Mandya khuaa cheng, MD Rajana chuan Mandya-a Judicial Magistrate First Class (JMFC) Court-ah thupek siamtu, Supreme Court judge pahnihte lakah complaint a thehlut. A complaint thehluhah hian Karnataka leh Tamil Nadu chief minister-te hming pawh a ziak lang.

MD Rajanna chuan Constitution Article 262 chuan tui chungchanga state pahnihte buainaah Supreme Court chuan thuneihna a nei lo tia tarlan a nih thu sawiin, an thubuai chu an lo relfel sak theih a ni lo, a ti. Court chuan a complaint thehluh hi September 14-a ngaihtuah turin a dah.

Karnataka sorkar pawh Surpeme Court-ah kalin, Tamil Nadu hnenah Cauvery lui tui cusec 15,000 pechhuak tura a hriattir chu cusec 1,000-a tihniam sak turin a ngen a, a ngenna hi a rang thei anga ngaihtuah sak turin a ti bawk. Hei bakah hian ni 10 chhung lui tui pe tura a tih chu ni 6 chhung atana thlak sak turin a ngen a, anmahni state ngei pawhin tui lamah harsatna lian tak an tawk mek tih sawiin, Supreme Court thupek duh loa nawrh huaihawt vang chuan nitin cheng vaibelchhe 500 an hloh tih a sawi.

Tamil Nadu state tan lui tui pek hi duh loin Mysuru, Hassan, Mandhya leh Bengaluru district-ahte nawrh huaihawt chhunzawm a la ni a, kawngpui pawimwahte an dang a, hei vang hian Bengaluru-a IT industry chuan a tuar nasa hle.