Canada food regulator-in him tawkah Maggi a ngai

Canada rama ei tur enfiahtu, Canadian Food Inspection Agency (CFIA) chuan Nestle India siam, Maggi noodles an lak luhte chu ei atana a him tawk tiin a sawi.

Ram chhung state hrang hrangah Nestle India siam, Maggi noodles chu a him tawk lo tia hralhchhuah khap a nih hnuah, United Kingdom-a ei tur enfiahtu, Food Standards Agency (FSA) chuan Maggi noodles-a lead awm zat chu European Union phal chin a ni tiin, mihring ei atan a him tih a lo sawi tawh bawk. Hemi hma hian Singpaore food regulatory pawhin India ram aṭanga Maggi noodles an lakluh chu a him tih a sawi bawk. CFIA chuan Maggi noodles an lakluhte chu enfiah a nih hnuin mihring hriselna atana pawi thei engmah hmuh a ni lo tih a sawi. India ram boruak pawh an thlithlai reng thu leh, ramdanga ei tur enfiah tute pawh an thawhpui zel tih a sawi. CFIA chuan an enfiah chinah Maggi hi him tawka a ngaih thu tarlangin, ei tur dang pawh a him tawk loa an hriat chu enfiah zel turin mipuite a chah bawk.