Mumbai-ah thla tin mi 884 an bo
Mumbai police-te chuan kum 10 kalta chhung khan thla tinin Mumbai khawpui aṭangin mi 884 chin hriat loha bo an awm ṭhin tih an sawi. Bo zinga a tam zawk hi hmeichhe naupang, kumtlinglo te an ni.
Police-te chuan kum 10 kalta chhung khan Mumbai khawpuia chin hriat loha bo hi mi 1,10,547 an tling a ti a, heng zinga mi 1,00,439 chu zawnchhuah an nih thu leh mi 10,108 te erawh chu an chin hriat zui lohin an awm thu an tarlang.
Mumbai Police Crime Branch hnuaia Missing Person Bureau-in chart a tihchhuahah, bo zingah hian hmeichhe naupang 18,547, hmeichhe puitling 37,603, mipa naupang 17,195 leh mipa puitling 37,202 an awm tih an sawi.
Bo zinga 90% zet hi chhui chhuah leh ni mah se, tun thleng hian chin hriat lohin hmeichhe naupang 582 leh hmeichhe puitling 2,944 an la awm a ni.
Khawpui chhungah khawchhak lam bial aṭangin chin hriat loha bo an tam ber a, thla sarih kalta chhung khan khawchhak lam bial aṭang hian mi 1,717 an bo a, khawthlang lam bial aṭangin 1,560, hmarlam ah mi 1,174, khawpui laili lai aṭangin mi 1,085 leh chhim lam bial aṭangin mi 360 an bo. Bo zing a zahve chuang hi mi rethei chenna, slum area-a cheng an ni.