Maha-in sakhaw zirtirna hmun school-ah a pawm lo

Maharashtra-a BJP sorkar chuan Islam sa­khaw chungchang zirtir­na school, madrasa chu school pangngai angah pawm a ni lo, a ti.

State minorities af­fairs minister, Eknath Khadse chuan Islam sa­khaw zirna school, Ma­dra­sa-ah chuan Maths leh Science subject-te eng­mah zirtir loin, Islam sakhaw chanchin chauh zir­tir an ni tiin, hengte hi school anga ngaih an ni lo tih a sawi.

Minister chuan, "Ma­dra­sa te chuan zirlaite hnena formal education pe loin, sakhaw chanchin chauh a zirtir a ni. Kan ram danpui hnuaiah naupangte chuan formal education dawng turin dikna chanvo an nei vek a, mahse hengte hi ma­drasas chuan a pe lo," a ti.

"Hindu emaw Kristian emaw te'n Madrasa-ah hian zir ve duh mah se, phalsak an ni lo. Hei vang hian madrasa hi school a ni lo a, sakhaw chanchin zirna a ni. Zirlaite hnenah subject dang pawh zirtir turin kan ngen tawh a, hei hi an tih theih loh chuan non-school anga ngaih an ni ang," tiin minister chuan a sawi.

Sorkar thutlukna hi Muslim leh eptu party-te chuan an sawisel a, All India Muslim Personal Law Board hruaitu Kamal Farooqui chuan, "Hei hi ruahmanna ten­awm tak leh hun lo tak a ni. Hetianga an tih chhan hi ka hrethiam lo a ni," a ti. Farooqui chuan Maha­rashtra-a madrasa-ahte hian zirlai 150,000 chuang zet an awm tih sawiin, formal education peng pakhat a ni a, zirlaite pawhin university-ahte admission pawh an hmu thei a ni, a ti.

Congress party thu­puang­tu, Sanjay Nirupam chuan sakhaw hmanga inthliarna a awm tur a ni lo tiin, State Assembly neih hunah hemi chung­chang hi an party chuan sawichhuah ngei a tum tih a sawi.

State sorkar hian a hma­in an state chhunga ma­drasa-te chu English, Maths, Science leh Social Science subjet-te zirtir tel turin a ti a, registered ma­drasa 1,890 zinga 550 chuan hei hi rem an ti tawh a ni.