SC-in Karnataka tana thupek siam tidanglam

Supreme Court chuan Karnataka state tana Cauvery lui tui pekchhuah dan chungchangah thupek a siam chu nimin khan a tidanglam.

September 5 khan SC hian Karnataka state hnenah hian a ṭhenawm, Tamil Nadu state tan Cauvery lui tui chu ni 10 chhung nitin cusecs 15,000 pe chhuak ziah turin a hriattir a ni. Court thupek hi duh loin Karnataka state chhung hmun hrang hrangah nawrh huaihawt a ni zui bawk.

Karnataka state pawh≠in tui lam indaihlohna nasa tak an tawh ve reng thu, mipui lungawi loten an nawr nasat thu sawiin, SC-ah hian thupek a siam hi ngaihtuah ṭha turin a ngen a, nimin khan court chuan a tui pekchhuah tur hi cusecs 12,000 atan a siam danglam sak a, September 20 thleng tui hi pe turin a ti bawk a ni.

Tamil Nadu leh Karnataka state-te'n Cauvery lui tui an inchuh chung≠chang ngaihtuahtu, Justice Dipak Misra leh UU Lalit awmna bench chuan Karnataka state aiawhte chu an state chhunga dan leh thupek kenkawh ṭhat loh chu SC thupek siam tawh thlak danglam tirna hmanruaa hmangah puhin an sawisel. Karnataka leh Tamil Nadu sorkar aiawhte chuan an state-ah dan lekkawh ṭha turin an hrilh a, thupek siam danglam a nih leh hma loh chuan mipui leh sorkar chuan court thupek ang chu an pawm mai tur a ni, a ti.

Cauvery lui tui inchuh vang hian nimin thleng khan Karnataka leh Tamil Nadu-ah buaina a la chhuak. Karnataka-ah Tamil Nadu number motor-te beih an ni a, Mylapore-a Udipui restaurant, New Woodlands hotel chu petrol bomb hmanga beih a ni bawk. Hotel-ah hian lehkha hmuh a ni a, he lehkhaah hian Karnataka state-ah Tamil mite beih an nih zel chuan pawikhawihna tam zawk an la thlen tur thu a inziak a ni. KRS dam aṭangin Tamil Nadu ramri bula Mandya khua thlengin bike rally huaihawt a ni a, Mandya khuaah hian Tamil mite dawr panga beih an ni.

Tamil Nadu-a Ramanathapuram district-ah Tamil activist-te'n Karnataka registration bus-te an bei a, motor panga an tihchhiatsak.