Punjab-ah Congress MLA 32-te'n nawrh huaihawt

Punjab-ah Congress MLA 32-te'n Assembly House chhungah Thawh≠ṭanni khan darkar thum chhung nawrh an huaihawt.

Congress MLA-te hian Assembly inkhawmah no-confidence motion an put luh chu sawiho an phut a, mahse Speaker chuan voice vote a la nghal a, Congress motion putluh hi a tlang zo lo a ni. Voice vote lak zawh hian rorel inkhawm hi tihtawp nghal a ni a, mahse Congress member-te hi chhuak ve duh loin darkar thum zet House chhungah hian an awm zui a ni.

Punjab state chhunga dan leh thupek din≠hmun tlahniam zel chungchangte, SYL Canal buaina te, mafia group rawn inlar chho zel leh an state-a eirukna hluar chungchangah Congress hian sorkar rintawk lohna motion hi a pu lut a ni.

Voice vote hmanga motion hneh a nih hnu Akali leh BJP MLA-te chuan House hi an chhuahsan a, mahse Congress member-te chu sawiho chhunzawm zel phutin an chhuak ve duh lo. Assembly staff-te'n power an off hnuah pawh an awm chhunzawm a, air-conditioner leh fan-te off vek a nih avangin khaw lum tak hnuaiah darkar thum zet an ṭhu a ni. Kawngkhar pawh pakhat chauh hawnsak an ni bawk.

Congress Punjab state unit president Captain Amarinder Singh chuan House chhunga MLA-te an la awm laia light leh air-conditioner-te an off tir avangin thuneitute chu a dem thu a sawi. "Sorkar chu debate lak aṭang hian a tlanchhe tur a ni lo, state chhung mi nawlpuiten an him tawk tawh lo nia an inngaih avangin hemi chungchanga eptute aw chhuah chu a hma≠chhawn ngam tur a ni" a ti. Speaker-in an state tana thil pawimawh tak tak sawiho a remti lo chu a democracy kalphung lo hle nia a ngaih thu a sawi.

Hetihlai hian Punjab Chief Minister Parkash Singh Badal chuan Congress party chu tlanchhia leh, assembly-a debate neih lai tibuaiah a puh thung.