Khuarel chhiatna thleng tuartu state-te Rs vbc 1,554.99 pe dawn

Union home minister Amit Shah kaihhruai committee chuan National Disaster Response Fund (NDRF) hnuaiah kum 2024 chhunga khuarel chhiatna hrang hrang - tuilian, leimin leh thlipui tuartu state panga ṭanpuina, Rs vbc 1,554.99 pek belh a remti.

Sorkar laipui chuan khuarel chhiatna tawk state-ten chawmdawlna leh puihna tur a rang thei ang bera an dawn theihna turin, heng state hrang hranga chhiatna thlennaah Inter-Ministerial Central Teams (IMCT) chu tirin, chhiatna thlen dante an enfiah a ni. Hetih lai hian nikuma Wayanad leimin vanga mi 400 chuang an thih phahna, Kerala state erawh chhawmdawlna pek belh tur zingah hian thlan chhuah an ni ve lo thung.

Kerala sorkarin chhiatna thleng vanga puihna pe tura a dilna chu sorkar laipui hian lo hnawl mah se, state tan hian pung awm lo loan a ruahmansak thung. Loan pung awm lo hi Scheme for Special Assistance to States for Capital Investment (SASCI) aṭanga pek niin, Rs vbc 529.50 chu Kerala sorkar tan hian a ruahmansak a ni.

Sorkar laipui chuan 2024-25 financial year atan state 27 hnenah, SDRF kaltlangin Rs vbc 18,322.80 a pe chhuka tawh. Hei bakah NDRF hnuaiah state 18 tan Rs vbc 4,808.30 a pe tawh bawk. State 14 hnenah State Disaster Mitigation Fund (SDMF) aṭangin Rs vbc 2,208.55 leh National Disaster Mitigation Fund (NDMF) aṭangin state pariat hnenah Rs vbc 719.72 a pe bawk a ni.