PM-in Russia leh Central Asia ram a tlawh dawn

Prime Minister Narendra Modi chu ni riat thanga Russia leh Central asia ramte tlawh turin vawiin hian a zinchhuak dawn.

PM Modi hian vawiin-ah Uzbekis­tan a pan dawn a, hemi hnu hian Kazakh­stan, Turkmenistan, Kyrgyzstan leh Tajikistan-te a tlawh bawk ang. Russia-ah BRICS (Brazil, Russia, India, China, South Africa) summit leh Shanghai Cooperation Organisation sum­mit hmang turin a kal bawk ang.

Nimina chanchin thar la­khawm­tute a kawmnaah, PM Modi chuan, "Central Asia rama mihring bitna ber, Uzbekistan ka tlawh hmasa ber ang. India leh Uzbekistan hian inlaichinna ṭha tak a nei a ni," tiin, a zin tur hi ram pahnihte inzawmna ṭha zawk siamna tura peng pawimawh tak a ni, a ti.

Uzbekistan President Karimov nen meeting an neih tur thu sawiin, Modi chuan thawhdunna tur inremna thuthlung pawimawh tak an ziak dawn tih a sawi bawk.

July 7-ah Central Asia-a ram lian ber, Kazakhstan a pan ang. Kazakhstan hi Central Asia-a sumdawnna lama India thawhpui lian ber a ni. Kazakhstan President Nursultan Nazarbayev hmuin, document pawimawh tak tak an ziakfel ang.

PM hian Kazakshtan aṭang hian BRIC summit hmang turin Russia a pan dawn a, summit zawh July 11 hian Turkmenistan a tlawh ang. Kum 1995 hnua India PM zinga Turkmenistan ram tlawh hmasa ber tur a ni. A cham chhungin Mahatma Gandhi lim bakah, Traditional Medicine and Yoga Centre a hawng dawn a ni.

Turkmenistan aṭang hian Kyrgyzstan a pan leh ang a, Kyrgyz Field Hospital tan medical equipment te a hlan nghal dawn a ni. July 12 hian Tajikistan-ah kalin, July 13-ah a rawn kir ang.