Vyapam scam: Medical college dean thi-a hmuh a ni

Madhya Pradesh-a Vya­pam scam-a inhnam­hnawiha puhte zinga mi, Jabalpur Medical College dean, Dr Arun Sharma chu Delhi hotel-ah thi-a hmuh a ni.

Hemi hma hian Vya­pam buaina chungchang report tu, journalist Akshay Singh chu mak tak maiin interview a neih hnu lawkah thia hmuh a nih tawh bawk. Singh hian Vyapam scam-a hmeichhe pakhat hming lang ve chu a kawm a, interview a neih zawh hnuah a ruang hi rel kawng bulah chhar a ni.

Dr Arun Sharma hi Madhya Pradesh-in Vyapam kaltlanga doctor lem dahte chhui chiang tura sorkarin committee a dina chairman a ni. Jabalpur-a Netaji Su­bhash Chandra Bose Medical College dean ni bawk, Sharma hian Delhi-a a thlenna hotel staff chu Pathianni zingah kai tho turin a chah a, mahse zinga an han koh hian chhangtu a awm loh avangin a room hi an hawng a, a ruang hi an hmu ta a ni. A taksaah hliam hnuhma hmuh a ni lo a, nimin khan a ruang hi postmortem a ni.

Vyapam scam hi Madhya Pradesh-a Ma­dhya Pradesh Profes­sional Examination Board (MPPEB), Ma­dhya Pradesh Vyavsayik Pareeksha Mandal (Vya­pam) tia sawi bawk kal­­t­langa admission lak­na tura dik lo taka thiltihna lian tham tak a ni a, he thilah hian politician, senior official leh sumdawng liante an inrawlh nasa nia sawi a ni. Vyapam hi state sorkar hnuaia autonomous body a ni a, kum 1970 khan medical course zir turte tana entrance test buatsaih turin Pre Medical Test Board anga din a ni. Kum 1981 khan engineering zir tumte tan Pre Engineering Board a din leh a, mahse board pahnihte hi kum 1982 khan Professional Examination Board (PEB) tiin chhunfin an ni.

MPPEB in medical and engineering course tan entrance test a buat­saih bakah, sorkar hna ṭhenkhat pawh a la tel bawk. Entrance test hrang hrang a buatsaihnaah hian official-te chuan thamna lain, candidate eng emaw zat an thun nia sawi a ni.

Vyapam thu­buai­a thuhretu leh in­hnam­hnawiha puh zinga mi 33 chu kum nga kalta chhung khan an thi tawh a, hei vang hian eptute chuan hemi chungchang hi CBI chhuitir an phut a ni.

Mahse Chief Minister Shivraj Singh Chouhan chuan Vyapam buaina chu CBI chhuitir kher a ngai lo tih sawiin, Madhya Pradesh High Court enpuina hnuaiah Special Investigation Team (SIT) in a chhui mek a ni, a ti.