Hnam leh sakhua chhiarpui tlangzarh

Sorkar laipui chuan India ram chhunga hnam, sakhua leh an dinhmun hrang hrangte zirchianna tura chhiarpui a neih, Socio-Economic and Caste Census 2011 chu kar hmasa khan a tlangzarh.

Census hi Union Finance Minister Arun Jaitley-a'n a tlangzarh a, hetiang chhiarpui hi kum 1934 hnua buatsaih lehna hmasa ber a ni. Minister chuan chhiarpui an neih hian India ram dinhmun dik tak a tarlang dawn a ni, a ti.

Ministry of Rural Development in a buat­­saih chhiarpuiah hian, thingtlang biala chhungkaw 30% te chu ram nei lo an nih bakah, nitina inhlawhfak chu an sum lakluhna pui ber a ni tih hriatchhuah a ni. Hei bakah hian thingtlang biala chhungkaw 23.5% zingah, kum 25 chunglam ziak leh chhiar thiam an awm lo bawk.

Census tlangzarhtu, Minister Jaitley chuan chhiarpui neiha an thil hmuhchhuah chu sorkar laipui leh state sorkarin scheme leh program siamna atan behchhanah an hmang thei dawn a ni, a ti. Hei hi ṭangpui ngaite ṭanpuina tur leh, policy mumal tak siamnaa atan behchhan tur ṭangkai tak a ni tih a sawi.

Rampuma sum lakluh zingah 10% chu thingtlang mite lak luh a ni. Thingtlang biala cheng zingah 4.6% te'n chhiah an chawi a ni.

Thingtlanga cheng zingah chhungkaw 28% te'n landline phone emaw mobile emaw an la nei lo a, chhungkaw 11% chauhin refrigerator an nei.