Google-in Bangaluru-ah office thar hawng

Google chuan khawvel huapa an office lian ber ni turin, nimin Ningani khan Mahadevapura, Bengaluru-ah office thar 'Ananta' an hawng.

Office thar hi square feet mtd 1.6 a zau niin Bagamane Tech Park-in kum ruk chhung an sak hnuah Google hian thla 11 chhung a chei hna hi an thawk. Office thar hi hnathawktu 5,000 chuang chhawr theih na tur a ni. Google hian India-ah hnathawktu 10,000 a nei mek bawk.

Office hming 'Ananta' tih hi Sanskrit ṭawng aṭanga lak "Infinite or Limitless" tihna a ni. Tui hman hlui 100 per cent hman nawn theih tura duan a nih bakah energy hman tih tlem nan smart glass hman a ni bawk. Floor tinah hian khawpui hmelhmang lan tir thei chhuat hman niin, team hrang hrang awmna tur 'Neighbourhood' siam a nih bakah punkhawmna hmun tur amphitheater-style 'Sabha' tih hming vuah siam a ni.

Google Office thar hi Bengaluru greenery kalphung anga duan niin kea kalna tur leh ramngaw hmun 'Aranya' chu thawm bengchheng tih ziaawm nan siam a ni bawk. Campus hi tualchhung hmanrua te hmanga design vek niin, campus chhung chhuatah hian mit lam harsatna neite kawng bo lohna turin kawng kawhhmuh theitu tur dah a ni bawk.