President hlui Abdul Kalam vuiliam a ni ta A vuinaah mi nuai khat chuang an tel

President hlui, Dr APJ Abdul Kalam chu nimin khan chawimawina famkim nen vuiliam a ni ta.

Kum 83 mi, Abdul Kalam hi Thawhṭanni zan khan Shillong-ah a thi a, a ruang hi Delhi-ah lakthlak a nih hnuin Nilaini khan an khua, Tamil Nadu-a Rameswaram thlenpui a ni.

Missile Man tia sawi ṭhin, President hlui Kalam-a ruang hi Nilaini zan dar 10 vel han Pallivasal Street-a a inah dah a ni a, nimin zing thleng khan dah niin mi tam takin zahna chibai an buk a ni. A chenna-in aṭang hian a ruang hi nimin zing dar 9.30 khan vuina inkhawm neihpui turin mosque-ah lak a ni.

Nimina President hlui vuina inkhawmah hian Prime Minister Naren­dra, Congress vice president Rahul Gan­dhi, union minister leh chief minsiter eng emaw zat an tel.

Mipuite ngainat hlawh, President a nih lai pawha 'People's President' tia sawi, Abdul Kalam hun hnuhnunga tel ve tumin ramchhung hmun hrang hrangin Rameswar khua an pan khawm a, mi nuai khat chuang zetin nimin khan an thlah liam an ni. A vuina inkhawma tel tum hian Rameswaram khua hi rel, bus leh lawng tein an pan a, mi tam tak chuan ke-a panin, Nilaini zan khan kawng lakahte an riak a ni.

Tamil Nadu sorkar chuan President hlui zahna lantirna atan nimin khan an state pumah public holiday a puang a, Rameswaram khuaah chuan sumdawnna hmun leh hotel-te pawh Abdul Kalam zahna lantirin an khar a, zu dawr leh bar-te pawh khar vek an ni.

Search giant, Google pawhin Pre­si­dent hlui Kalam-a zahna lantirna atan nimin khan a homepage-ah ribbon dum a dah a, he ribbon duma cursor dahin "In memory of Dr APJ Abdul Kalam" tih a lo lang.