Nagpur jail-ah Yakub Memon khaihlum

Kum 1993-a Mumbai khawpuia bomb tihpuah vanga thi tura thiam loh chantir, Yakub Memon chu a pian champa vawi 53 na, nimin khan a tanna Nagpur District Jail-ah khaihlum a ni ta.

Supreme Court-a zah­ngaih­na lantir tur leh, tihhlum a nih hun tur tikhawtlai tura Yakub Memon-a dilna chu Nilaini khan hnawlsak a nih leh tak avangin, Terrorist and Disruptive Activities (TADA) court, Mumbai-in July 30 zinga khaihlum tura a tih angin khaihlum a ni ta a ni.

Zing dar 6.30 velah Yakub Memon hi khaihlumna hmun panpui a, zing dar 7.01-ah medical team chuan a thi tih puangin, a ruang hi post mortem a nih hnuah a chhungte hnenah hlan a ni a, zing dar 10.45 khan venhimna khauh tak hnuaia a ruang hi phum turin Mumbai lamah lak a ni. Khaihlum a nih hma hian Memon-a'n a ngen angin Mumbai-a a fanu nen telephone-in an inbiak tir.

Mumbai police-te chuan Memon-a chhungte chu dan pangngai anga vuina inkhawm buatsaih a phalsak lo a, a ruang lakna, a chhungte chenna Mahim bial pawh police-te'n uluk takin an veng bawk.

Memon hi mi 257 thihna leh midang 700 chuangin hliam an tuar phahna, kum 1993 March 2-a Mumbai khawpuia ṭum eng emaw zat bomb tihpuahnaa inhnamhnawiha puh zinga tihhlum hmasak ber a ni. He pawikhawihna vang hian mi 11 chu thi turin an chungthu relsak ni mah se, midang 10 te chu an hremna tihnep sakin, damchhung tang tura relsak leh an ni.

Kum 2007 khan Mumbai Special Court chuan Memon hi thi turin a chungthu a relsak a, kumin April 30 khan Special TADA court chuan July 30-a khaihlumna tur thupek a tichhuak a ni.

Court thupek tihchhuah hnu hian Memon hian President, Supreme Court leh Maharashtra Governor-te hnenah zahngaihna lantir turin dil mah se, a dilna hi an hnawlsak vek a ni.

March 12, 1993: Mumbai khaw­puiah vawi tam tak bomb tihpuah a ni a, mi 257 thiin midang 713 in hliam an tuar. He pawikhawihna hi Dawood Ibrahim leh Yakub Memon-a unaupa, Tiger Memon-te'n Hindu-Muslim buaina chhuaka Muslim mi tam tak thihna thlenga phuba lakna tura an rua­hman a ni. Tiger Memon hi bomb a puah hnuah a tlanbo ve nghal.