Cauvery tui inchuh vanga buainain ziaawm lam pan

Cauvery lui tui inchuh vanga Karnataka leh Tamil Nadu state-a buaina chhuak chuan ziaawm lam a pan tawh a, Bengaluru khawpuiah pawh boruak a pangngai tawh a, curfew puan pawh hmun tam zawkah hlih a ni tawh.

Police official-te chuan Bengaluru khawpui bo≠ruak pawh a ṭha tawh a, dawr, hotel leh office-te pawh hawn an ni leh vek tawh tih an sawi. Khawpui chhung hmun ṭhenkhata curfew puan chu hmun tam zawkah hlih a ni tawh a, mahse vawiin thleng hian khaw≠pui hmarthlang leh chhim≠thlang lam bialah chuan curfew hi puan chhun≠zawm rih a ni ang.

Karnataka sorkar-in Supreme Court thupek anga a ṭhenawm, Tamil Nadu state tana Cauvery lui tui a pek chhuah avangin Karnataka state chhung hmun hrang hrangah lungawi lohna lantirin, nawrh huaihawtten thil tam tak an tichhia a ni. Karnataka-a Tamil Nadu register motor
ṭhen≠khat beih leh hal a nih vang te, Tamil mite leh an sumdawnna hmunte beih an nih vangin Tamil Nadu lamah Karnataka mi awmten beih an tawk a ni.

Prime Minister Narendra Modi pawhin state pahnih mipuite chu buaina siam lo turin a ngen a, Cauvery lui chungchanga state pahnihte buaina chu inbiakna hmang chinfel theih a ni, a ti.

Nimin zing khan Karnataka Chief Minister Siddaramaiah chuan meeting a ko a, state chhunga buaina chhuak vanga dan leh thupek kenkawh dan chungchangte an sawiho. State sorkar chuan Bengaluru khawpui boruak chuan ziaawm lam pan mah se, venhim hna thawk turin central force dah belh a tum.