Chikungunya vei 12,000 awm tawh

Delhi leh khawpui dang ṭhenkhatah Chikungunya hri vei an pung zel a, he hri vei hi 12,000 an chuang tawh. Ni hnih chhungin Delhi-ah mi panga-in an thihpui nia sawi a ni a, Delhi khawpui bikah hian he hri veitu hi mi 1,000 an tling tawh a ni.

National Vector Borne Disease Control Programme (NVBDCP) chuan August 31 thleng khan chinkungunya vei hi 12,255 an awm tawh niin a tarlang. Karnataka state-ah hri vei hi mi 8,941 an awm tawh a, Maharashtra-ah 839 leh Andhra Pradesh-ah mi 492 an awm.

Delhi sorkar chuan ni hnih chhunga Chikungunya hri vei mi pangain an thihpui nia media report chu, chhuichiang turin thupek a tichhuak. Health Minister Satyendar Jain chuan medical report lamah Chikungunya vanga thi hi an awm lo a, mahse media lamten dik lo takin he hri leng chungchangah hian thu an thehdarh niin a sawi.

Doctor-te chuan Chikungunya hi a tlangpuiin thihna thlen thei khawp hri a ni lo tih an sawi a, mahse naupang leh tar chak lo zingah a la na deuh chuan an thihpui chauh a ni, an ti. Minister chuan khawpui chhunga dengue leh Chikungunya veite enkawlna damdawi-in panga a tlawh a, in enklawna pawh a ṭha tawk tih sawiin mipuite chu chiai lo turin a ngen.

Delhi khawpuia Chikungunya leh dengue hri leng chungchangah, Delhi sorkar leh sorkar laipui chu health system chungchang ngaihthahah an inpuh tawn.

AAP sorkar chuan Lt. Governor Najeeb Jung leh municipal corporation-te chu hri leng laka invenna kalpui kawngah hma la ṭha tawk loah a puh a, hetihlai hian Delhi sorkar hi Chikungunya hri vei pung zel chungin ngaihthah puh a nih thung.

Chief Minister Arvind Kejriwal-a chuan Delhi-a thuneitu chu Lt. Governor leh Prime Minister Narendra Modi-te an nih avangin, hemi chungchang pawh hi an hnenah zawh zawk tur a ni, a ti. Kejriwal-a chuan, "CM chu thuneihna engmah nei loin dah a ni tawh a, pen lei tur pawhin thuneihna a nei lo. LG leh PM chuan Delhi-a thuneihna chu an pum≠hmawm vek tawh a ni" a ti.