Indian Army-in South Kashmir-ah beihpui thlak

Indian Army chuan Kashmir chhim lamah Calm Down operation neiin, boruak muanawm a awm theihna turin hel leh anmahni thlawptute lakah beihpui an thlak mek.

Hel leh amahni thlawptute chuan nawrh huaihawtin kawngpuite an dang a, hei vang hian sipai 4000 dawn tirh luh an ni a, mahse a theih chhung chu an ralthuamte chelek lo tura hriattir an ni tih official-te chuan an sawi.

Sipaite hian South Kashmir-a district pali - Pulwama, Shopian, Anantnag leh Kulgam te an dap a, CRPF leh state police-te'n an pui bawk. Security force-te chuan hel leh amahni thlawptute hian mipui kalvelna dang tur hian thingkungte kitin kawngpui an dang a, electric bante titluin, lung lian tak takte kawngpuiah hian an dah tih an sawi.

Pulwama-a Karimabad bial an thenfai hnuah, sipaite hian Shopian leh Kulgam an pan a, anmahni pui tur hian sipai dang tirh luh belh tum a ni bawk.

July 8-a Hizbul Mujahideen commander Burhan Wani kahhlum a nih avanga Kashmir Valley-a tualchhung buaina nasa tak a chhuah hnu khan hel 100 vel chu South Kashmir-ah hian a lut nia sawi a ni.

Kashmir Valley buaina chuan zia≠awm lam pan mah se venhimna uluk taka kalpui chhunzawm zel a ni. Police-te chuan Eid-ul-Adha hman zawhah inlakhran duhtuten nawrh liantham tak buatsaih leh an tum nia report an dawn vangin nimin khan Sringar leh Valley-a district hrang hrangah security force
ṭhahnem tham tak duty tir an nih thu an sawi. Nimin khan a ni thumna atan internet service, mobile phone leh broadband ah tihtawp chhunzawm a ni bawk.