Defence Ministry-in Embraer Aircraft Deal chhui chian phut

Defence Ministry chuan kum 2008-a Embraer Aircraft leina tura inremna siam danah thil dik tawk lo a awm nia sawi a nih avangin, Central Bureau of Investigation (CBI) chu chhui chiang turin a ngen.

Defence Research and Development Organisation (DRDO) chuan a hma pawhin Brazil company, Embraer chu kum 2008-a inremna siam turah hian UK-a mi, India mi pawm chu middleman atan a chhawr nia sawi chungchangah insawifiah turin alo ti tawh bawk.

Embraer Aircraft Deal hi Congress kaihhruai UPA sorkar term hmasa zawk hun laia ziah a ni a, aircraft leina tur atan hian dollar maktaduai 208 in an inrem a ni.

Inremna an siamah hian Brazil company, Embraer hian Airborne Early Warning and Control Systems (AEW&C) atana radar-a dahna, aircraft pathum chu India hnenah a supply dawn a ni. Mahse inremna siampui tur hian official ṭhenkhatin thamna sum an dawng nia media report a awm avangin defence ministry chuan chhui chian a tum a ni.

Sorkar laipui chuan inremna siam chungchangah thamna sum la an awm nia sawi hi ngaihthah mai chi a ni lo tih sawiin, hei vang hian CBI pawh hi chhui tura ngen a ni, a ti.