PM Modi hnenah US chawimawina sang 'Legion Of Merit' hlan

US president Donald Trump chuan Thawhṭanni khan US chawimawina sang, Legion of Merit chu prime minister Narendra Modi hnenah a hlan a, hei hi ram pahnihin thawhdunna ṭha tak an neih theihna tura PM Modi-a'n hma a lak ṭhatna avang leh India global power a nih theihna tur kawnga a thawh ṭhat avang a ni.

US-a India Amba­ssador, Taranjit Singh Sandhu chuan prime minister Modi aiawh hian chawimawina hi a dawng a, US National Security Advisor Robert O'Brien chuan White House-ah chawimawina hi a hlan.

Robert O'Brien hian twitter-ah chawimawina an inhlan lai thlalak hi tweet-in a caption-ah president Trump-a'n India prime minister Narendra Modi hnena US-India inkara inkungkaihna ṭha a awm theihna tura a thawh ṭhat vanga Legion of Merit a hlan thu hi a tarlang a ni.

Head of State/Govern­ment chiahin an dawn theih chawimawina sang hi PM Modi hnena hlan a nih bakah hian Australian prime minister Scott Morrison leh Japanese prime minister Shinzo Abe-te hnenah hlan a ni bawk a, anni pawh hi an aiawhin an ambassador-te'n Washington DC-ah an dawng ve bawk a ni.