IISF 2020 PM Modi-a'n a hawng

Prime minister Narendra Modi chuan nimin khan video conferencing kaltlangin khawvela virtual science festival lian ber ni tura sawi India International Science Festival 2020 (IISF 2020) chu a hawng a, he hunah hian Union science and technology minister Dr. Harsh Vardhan pawh a tel.

IISF 2020 hi Union Ministry of Earth Sciences, Union Ministry of Science and Technology leh Vijnana Bharati (VIBHA) ṭangkawp buatsaih niin nimin aṭanga Krismas ni, December 25 thleng hian neih a ni dawn. Event hrang hrang 41 lai a awm dawn a, nimin thleng khan festival chhim tura hming ziak lut hi sing kua vel an awm tawh.

'Science for Self-reliant India and Global Welfare' tih chu kumin thupui niin kumin hi IISF vawi nga an buatsaihna a ni.

India rama science leh technology chawisanna atan kum 2015 aṭang khan IISF hi buatsaih ṭan a ni a, nikumah khan Kolkata khawpuiah buatsaih niin kuminah erawh hripui a len avangin virtual-in an buatsaih ta thung a ni.