July 2 hnua hri kai hmuh chhuah thar tlem ni ber a thleng

Ministry of Health and Family Welfare-in nimina report a tihchhuahah chuan Thawhṭanni khan Covid-19 hri kai hmuh chhuah thar 19,556 an awm a, hei hi July 2 hnua hri kai hmuh chhuah tlem ber a ni hial.

India ramah hian thla ruk dawn chu ni khata hri kai hmuh chhuah thar hi sing hnih aiin an tlem ngai lo a, a tam vanglai phei chuang sing kua chuangte ni khatah hmuh ṭhin niin tunhnaiah hri kai hmuh chhuah thar zat hi a tlahniam pheuh pheuh a, Thawhṭanniah phei kha chuan sing hnih aia tlem hi an hmu chhuak leh ta a ni. 

Nimina sorkar report tihchhuah thleng hian hri kai tawh zawng zawng zat chu  1,00,75,116 an ni tawh a, hetihlai hian enkawl dam pawh an tam tawh hle a, 96,36,487 laiin an dampui tawh. Hri kai mek zat pawh tlahniam ve zelin Thawhṭanniah kha chuan nuai thum pawh an tling tawh lo a, 2,92,518-in hri an la kai mek. Pathianni thleng kha chuan mi nuai thum chuangin hri an la kai thung.

MoHFW-in nimina report an tihchhuahah hian thihpui pawh a hma ni aiin an tlem zawk a, 301 an awm.

Maharashtra, Karnataka, Andhra Pradesh, Tamil Nadu, leh Kerala-te chu hri kai tam zualna an la ni chhunzawm zel bawk.

Covid-19 kai tawh dam leh rate hi 95.65% lai a ni tawh a, thihpui rate chu 1.45% a ni thung.