Farm law duh loin loneitute ni 27 chhung an nuar tawh

Sorkar laipuiin Farm law a siam thar duh loa nawrh huaihawt loneitu pawl hrang hrangte chu nimin thleng khan ni 27 chhung an nuar tawh a, hetichung hian sorkar laipui leh loneitu pawlte an la inbe fel hlei thei lo.

Sorkar laipui lam hian loneitu pawl aiawhte hi inbiakpui tum leh mah se loneitute hian dan thar pathum paih a nih dawn loh thu an la sawi zel a ni.

Tiam chin awm loa chawingheia nawrh huaihawt ṭhenkhat chuan Thawhṭanni khan  Bathinda-a District administration Complex kawtah duh lohna an lantir a, heta nawrh huaihawtte hi Bharatiya Kisan Union (BKU) niin an tarlang.

Niminah pawh khan Delhi-Meerut expressway chu lirthlei tlan theih loin khar a la ni a, loneitu duh lohna lantirte hian zing dar 7:30 vel aṭang khan helai kawng hi an dang leh a ni.

Delhi-Ghaziabad kawng pawh khar chhunzawm zel niin Ghaziabad aṭanga Delhi pan tumte chu kawng dang zawh mai tura hriattir an ni bawk.

Bharatiya Kisan Union thupuangtu Rakesh Tikait chuan farm law chungchanga inbiakna neihpui tur hian Union Agriculture Minister hnen aṭangin sawmna an dawng lo tih a sawi. Loneitute chuan dan chu an paih a nih loh chuan thil dang engmah an pawm dawn lo tih a sawi a ni.