PM-in MP, Bihar leh Assam tlawh dawn

Prime minister Narendra Modi chu ni thum chhung state pathum tlawh turin nimin khan a zin chhuak. A hmasa ber turin Madhya Pradesh a thleng a, hemi hnu hian Bihar leh Assam a tlawh leh ang.

PM Modi chuan MP a thlen hnuah nimin vek khan Bageshwar Dham Medical and Science Research Institute, Chhatarpur-a sakna tur lungphum a phum nghal a ni. Vawiin Thawhṭanni hian investor summit hman tur a hawng dawn a, hemi hnu hian Bihar panin Bhagalpur-ah loneitute puihna tur, PM KISAN scheme 19th instalment a tlangzarh dawn a ni.

Vawiinah vek Assam a pan dawn a, chawhnu lamah Assam-a Jhumoir Binandini hmannaah telin, naktukah investment and infrastructure summit a hawng dawn a ni. PM Modi chuan Advantage Assam 2.0 Investment and Infrastructure Summit Guwahati-a neih tur hawnna hun a hmang nghal dawn bawk.

Bhopal, Madhya Pradesh-a nihnih chhung awh tur Global Investor Summit (GIS) hi MP tana khawvel huapa investment hmasawnna thlen thei tur niin, program hrang hrang - departmental summits, specialised sessions on pharma and medical devices, transport and logistics, industry, skill development, tourism leh Micro, Small and Medium Enterprises (MSMEs) huang kalpui dan tur zirho a ni ang. Latin America leh Caribbean ramte pual session neih tum a ni a, industrial exibition lian chi thum - auto show, textile and fashion expo leh ''One District-One Product' (ODOP) hmangin state themthiamna leh hnam ziarang tarlang thei thilte pholan tum a ni bawk. Summit-ah hian ram hrang hrang 60 aṭangin aiawh an rawn tel dawn a, international organisation hrang hrang official-te leh ramchhunga industry lian hruaitu 300 rual baka policy duangtu pawimawh tak tak te summit-ah hian an tel dawn niin an tarlang.

PM Modi chuan Bihar-ah hian loneitute hmasawnna leh puihna tur hian Central Sector Scheme a hawng nghal dawn a, he scheme hi loneitu 10,000 in an chhawr theih tur niin thlai thar chhuah hrang hrang tih hmasawnna tur a tih a ni. 10,000th Farmer Producer Organisation (FPO) hi Bihar tana mellung thar pawimawh tak tur a ni. Hei bakah Assam-a investment summit neih tur hi state economic hmelhmang tarlang thei tur a nih bakah industry hmasawnna tura tih niin, MSME sector-a hna thawh hmasawnna tarlang thei tur a ni bawk. Summit-ah hian exhibitor 240 chuang tel tura beisei a ni.