Telangana leiverh chimah mi 8 tang

Nagarkurnool, Telan­gana-ah Inrinni liam ta khan Srisailam Left Bank Canal (SLBC) leiverh chu chimin hnathawktu mi pariat a chhilh. Chhiatna thlenna hmun hi chhanchhuaktu leh engineer pawl pathumin Inrinni zan la la khan an thleng nghal a, chhanchhuah hna hi thawk nghalin thi leh hliam an awm em tih engmah hriat a la ni lo.

Nimin lam khan State Disaster Response Force (SDRF), Fire Services Department, leh National Disaster Response Force (NDRF) te chuan a ṭul ang angin chhanchhuah hna an thawk chhunzawm a ni.

Leiverh chim hian hnathawkte hi a delh em tih hriat theih a la ni lo a, Vaibhav Gaikwad, Superintendent of Police Nagarkurnool chuan," Tangte hi biak pawh an la ni lo a, chhanchhuaktu ten an thawm an hre pha lo bawk. Hei vang hian leiverh chimna aṭang hian an awmna a hla deuh niin rin a ni" a ti. Leiverh chima tangte hi an la dam a nih chuan chhanchhuah thuai theih beisei a nih thu a sawi bawk.

Telangana Irrigation minister Kumar Reddy chuan tang chhanchhuah dan chungchang kawng thum an ruahmante tarlangin, chunglam aṭanga verh emaw, a sir lam tanga verh emaw tui leh hnawmhnawkte thenfai hmasaka la dam awm te chhanchhuah emaw mai theih rin a nih thu a sawi. Mahse, tun dinhmunah hmalakna mumal neih thiam a har hle rih niin a sawi.

Cheif minister Revanth Reddy leh prime minister Narendra Modi-te pawh inbiain leiverh chima tangte chhanchuah nan theihtawp chhuah a nih tur thu leh hmalak dan turte an sawi dun. Lok Sabha Leader of Opposition leh Congress leader ni bawk,m Rahul Gandhi pawhin X kaltlangin tangte a ngaihven reng thu a tarlang ve bawk.