Ni 4 cham turin Nepal PM a rawn zin

Nepal Prime Minister Pushpa Kamal Dhal-a chu ni li cham turin nimin khan India ramah a rawn zin a, mi 125-in an rawn zui.

Prime Minister Narendra Modi-a'n zin tura a sawm angin Dahal hi a rawn zin a, August thlaa PM atana thlan tlin a nih hnua India ram a rawn zinna hmasa ber a ni.

Dahal hi a nupui Sita, minister pahnih, senior official-te, media team leh Nepali business community aiawhten an rawn zui.

Vawiin hian Prime Minister Modi nen Hyderabad House-ah meeting an nei dawn a, ram pahnihte thawhdunna tur thuthlung te an ziak nghal ang. Meeting zawh hnu hian joint press conference an nei zui ang.

Dahal-a Foreign Relations Advisor Rishiraj Adhikari chuan inremna an ziah tur zingah hian hun rei tak tihkhawtlai tawh, Nepal-a MW 4,800 pechhuak thei tur, Panchewhwor Hydro Project thawh chhunzawmna tur pawh a tel ngei a beisei thu a sawi. He project siam hi kum 1996 khan ram pahnihten an lo remti tawh a, mahse thil ṭhenkhatah inrem lohna an neih avangin an thawh chhunzawm thei lo a ni.

Nepal PM hian MW 400 hydro power plant siamnaah India puihna a dil dawn bawk niin Adhikari chuan a sawi.