Punjab-ah naupang 50,000 chuangin mid-day meal dawng lo

Comptroller and Auditor General of India (CAG)-in report a tihchhuah thar berah, Punjab state-a goverment aided school 32-a zirlai 50,000 chuangte chuan kum 2015, March thla tawp thleng khan mid-day meal an dawng ve lo tih a tarlang.

Punjab Vidhan Sabha session tawpni-ah report hi pharh a ni a, mid-day meal hi school 400-ah ni 4-245 chhung pek an ni lo bawk nia sawi a ni.

Mid-day meal scheme (MDMS) hi central sponsored scheme a ni a, naupang tam zawkin school an kal theihna atan te, a thlawna ei tur ṭha pek an nih theihna atana duan a ni.

Mahse CAG chuan Amitsar leh Ludhiana-a government aided school 32-a MDMS kalpui a nih loh vang hian he scheme hnuaia hamṭhatna an dawn tur chu zirlai 50,417 ten an dawng ve lo a ni, a ti. Hetihlai hian kum 2010-15 chhung khan Punjab state tan mid-day meal semna tur≠in cheng vaibelechhe 734.28 pekchhuah a ni.

School 180-te endik an nih hnuah, school 40-te chuan eisiamna tur sum an neih loh vang hian chhunah naupangte ei tur an sem lo fo tih hriat≠chhuah a ni bawk.

CAG chuan MDMS atana sorkar laipuiin sum a pek chu thil dangah pawhpen a ni tur a ni lo, a ti. Hei bakah hian school/block/district level-ah zirlai naupangte hnena ei tur sem ṭhina calorie leh protein awm zat tur bithliah chu zawm a ni lo bawk niin a sawi.