UN Rights hotuin Kashmir buaina chungchang sawichhuak

UN Human Rights hotu chuan Kashmir Valley-a buaina chhuak chu ram dangin a chhuichian a ngaih thu a sawi. Hei hi India chuan chhang letin, buaina chhuak hi ram pawn lam aṭanga ruahman vek a ni, a ti.

UN High Commissioner for Human Rights Zeid Ra'ad Al Hussein chuan Human Rights Council 33rd session-ah Kashmir chungchang hi a sawichhuak a, India leh Pakistan chuan UN team-te'n Line of Control-a an ram chin ve ve an tlawh phalsak turin a ngen.

Hussein chuan Kashmir-a buaina thlengah civil miten kut an tuar nasa hle nia report a dawn thu a sawi a, buaina thleng chungchangah ram pahnihte thuchhuah pawh a in ang lo hle a ni, a ti. Kashmir tualchhung buaina thleng vanga thi hi mi 80 an tling tawh a ni. Buaina chhuak chungchang chu international team-te'n uluk leh zalen taka an chhuichian phalsak tura a duh thu a sawi bawk.

India chuan UN Human Rights hotuin Kashmir chungchang a sawinaah, India leh Pakistan rorelna hmun tia a sawi chu a pawm lo tih a sawi a, Jammu and Kashmir state pumpui chu India ram chhunga awm a ni tiin, "Dik lo takin Pakistan hian kan ram ṭhenkhat min luahsak a ni. Kashmir chungchangah dinhmun ang khata chhiar theih kan ni ngai lo ang" a ti. Kashmir-a tualchhung buaina thleng chu Pakistan lam aṭanga ruahman vek niin a sawi a, hei bakah hian mipuiten nawrh an huaihawt karah an zingah tel a, security force-te beih tumin Pakistan ram aṭangin firfiakte India ramah an rawn lut ngei tih finfiahna pawh a neih thu a sawi bawk.