Chikungunya chung-changah report thehlut turin hrilh

Delhi-ah Chikungunya hri vangin mi pahnih an thih belh leh hnuah he hri leng vanga thi hi mi 12 an tling tawh a, hei vang hian Union Health Minister JP Nadda chuan hri leng vanga thi leh damlo an punchhoh zel chungchangah Delhi sorkar chu report thehlut turin a hrilh.

Delhi Water Minister Kapil Mishra chuan MLA leh councillor zawng zawngte chuan an inhriatthiam lohna dah ṭha a, thosi aṭanga kai theih natna hri leng mek tihrem a nih theihna tura theihtawp chhuah turin a ngen.

Delhi Lieutenant Governor Najeeb Jung pawhin mipuite chu chikungunya leh dengue hri leng mek do let tura bei turin a ngen bawk.

Delhi sorkar chuan nikum lam aiin dengue leh chikungunya hri vei report hi a tlem zawk niin a sawi. Kum 2015 khan dengue vei hi mi 15,876 an awm a, an zinga 60 in an thihpui a ni. Health expert-te chuan kum upa lamte chu an immunity level a hniam vangin an tan chikungunya hri hi thihpui a hlauhawm bik niin an sawi.