Tamil Nadu-ah bandh huaihawt
Karnataka leh Tamil Nadu state-te'n Cauvery lui tui an inchuhna kal zelah, nimin khan Tamil Nadu-ah bandh huaihawt a ni.
Supreme Court-in Karnataka state hnenah Tamil Nadu tana Cauvery lui tui pe chhuak tura a hriattir avangin Karnataka state chhung hmun hrang hrangah nawrh huaihawt a lo ni tawh a, an state-a Tamil mi awmte khawih an nih bakah, Tamil Nadu registration motor te pawh an bei tel bawk. Tamil mite beih an nih avanga lungawi loin, nimin khan Chennai khawpuiah bandh hi huaihawt a ni.
Chennai-a bandh huai≠hawt hi Tamil Nadu-a rorellai AIADMK leh a thawhpuite tih loh, political party dang zawng zawng leh trade organisation-te'n an thlawp vek a ni. Bandh huaihawt avang hian khawpui chhungah venhim hna thawk turin police 12,000 dah an ni a, mahse buaina chawk chhuak tum an awm lo niin police-te chuan an sawi.
Eptu pawl, DMK hruaitu MK Stalin leh DMK Rajya Sabha MP Kanimozhi bakah MDMK hruaitu Vaiko-te chu bandh huaihawt tur an thlawp vang hian nimin zing khan man an ni. Stalin hi a farnu, Kanizmohi nen Chennai-a rel kawng dannaah an tel avangin man an ni a, anmahni thlawptu pungkhawmte nen police-te chuan bus-in an hruai sawn a ni.
Bandh huaihawt vang hian Chennai khawpui chhunga dawrte an inkhar deuh vek a, kawtthlerah private motor tlanchhuak an tlem hle. Mahse sorkar motor bakah bus leh fight-te erawh chu a nghawng buai lo. School, college leh sorkar office-te pawh hawn vek an ni bawk.
Supreme Court chuan Cauvery lui tui inchuh vanga state pahniha buaina a chhuah hnuah, Ningani khan court thupek dodal zawngin kawtthlera lungawi lohna lantira punkhawm emaw, bandh huaihawt emaw khap a nih thu a sawi. State pahnih sorkar chu tharum thawhna thlengte an thunun theih loh avangin a khak zui bawk.
SC bench chuan, "Mipuite chuan an duhdanin dan a lo siam ve ngawt tur a ni lo a, hei vang hian Karnataka leh Tamil Nadu state thuneitute chuan hetiang thil thleng tur hi an dang thei tur a ni. Buaina siam a, vantlang leh sorkar hmun pawimawh khawih leh suasamte a thlen tawh lohna thra hmalak chu state sorkar mawhphurhna a ni", a ti.