J&K-a security force-te hnenah Silai kahtlang theih loh motor pe

Jammu and Kashmir-a mipui nawrh huaihawtten security force duty-te chu lunga an tawng ṭhin avangin sorkar laipui chuan sipaite hman tur hian bullet proof motor thar a pe.

Security force-te hman tura motor pek hi Panthera-T6 a ni a, pakhat man hi cheng nuai 75 vel niin, mipui thinrimten lung leh hmanraw dang hmanga beih lakah him thei tura duan a ni. A chhungah hian sipai pariat an ṭhu thei a, public monitoring system leh high resolution camera dah a ni a, mipui pungkhawmte thla chu 360 degree in a la thei a ni. Stretcher, damdawi leh tow bar-te chhawp sa vek a ni bawk.

Army unit tin hnenah bullet proof motor hi pahnih ṭheuh pek an ni ang.

Inlakhran duhtuten nawrh an huaihawt leh vangin nimin khan Srinagar leh Kashmir Valley-a khawpui lian zualahte chuan venhimna khauh taka kalpui a ni leh a, security force-te chuan mipui leh motor tlanvelte khuahkhirh an ni. Inlakhran duhtute chuan ni sarih chhung nitin nawrh leh kawngzawh huaihawt an tum thu an sawi.

July 9 aṭanga Kashmir Valley-a tualchhung buaina thleng vanga thi hi mi 88 an tling tawh. September 5-a Pulwama district-a security force-te nen an intihbuainaa hliam tuar, Basit Mukhtar kum 21 chu nimin khan a hliam tuar loin a thi a, Ningani khan Kulgam district-a intihbuainaa hliam tuar Rasiq Ahmad Bhat a thi bawk.

Tualchhung buaina thleng vang hian Kashmir Valley-a zirna in, dawr, public transport leh sumdawnna hmunte chu ni 70 chhung khar an ni tawh.