Firfiakte'n J&K-ah army camp an bei, sipai 17 thi

Jammu and Kashmir-a Indian army headquarters chu firfiakte'n nimin zing khan an bei a, sipai 17 an thi a, firfiak pali-te chu sipaite'n an kaphlum ve nghal.

Firfiak pali-te hi nimin zing dar 5 vel khan Line of Control bul, Uri-a 12th Brigade headquartes-ah hian lutin, grenade an vawm luh hnuah silai an hmetpuak zui a ni. Heng firfiakte hi LoC-a leiverh aṭanga kalin, ramri hungna an zaichhiat hnuah Kashmir-ah hian an lut a ni. Firfiakte hian sipai duty-te an inthlak laiin camp hi an bei a, sipaite hian bei let nghalin darkar ruk vel zet an inkap zui a ni.

Firfiakte nena an inbeihnaah hian sipai 17 an thih bakah, mi dang 30 velin hliam an tuar. Hei hi kum eng emaw zat chhunga ṭum khata inbeihnaa sipai thi tamna ber a ni. Kumin January thla khan firfiakte'n Pathankot air base an beihnaah sipai pasarih an lo kaphlum tawh bawk.

J&K-a army camp beih a nih vang hian Union Home Minister Rajnath Singh chuan nimina Russia leh US tlawh tura a zin tur pawh a ṭhulh a, emergency security meeting a ko. Meeting-ah hian National Security Advisor Ajit Doval, Union Home Secretary, Army, paramilitary leh Home Ministry official-te an tel. Singh hian J&K Governor NN Vohra leh Chief Minister Mehboob Mufti-te pawh telephone-in a be nghal a ni. Home Secretary Rajiv Mehrishi leh Home Ministry-a officer-te pawh J&K dinhmun hi thlithlai reng turin a hrilh.

Home Minister hi nizan khan ni li chama Russia tlawh tura zinchhuah tur a ni a, Russia aṭang hian US panin, Indo-US Homeland Security Dialogue neihnaah a tel nghal ang. Mahse J&K-a thil thleng avang hian a zin chhuah hun tur chu a sawn hla tih a sawi.

Defence Minister Manohar Parrikar leh Indian Army Chief Dalbir Singh-te pawh nimin vek khan Kashmir panin an kal nghal a ni.

Army camp beih a nih hi Pakistan-in Jammu and Kashmir tualchhung buaina tipunlun tura a ruahmanna pakhat niin sorkar lam chuan a sawi. July 8-a security force-te'n Hizbul Mujahideen firfiak, Burhan Wani an kahhlum avanga Kashmir Valley-a tualchhung buaina nasa tak chhuak vangin mi 80 chuang an thi tawh a, mi 10,000 velin hliam an tuar tawh bawk.

Prime Minister Narendra Modi chuan sipai camp beih a ni chu a dem thu sawiin, he pawikhawihnaa inhnamhnawihte chu hrem loha chhuah an ni dawn lo, a ti. Sipaite chuan camp beitu firfiakte chu Lashkar-e-Taiba (LeT) member niin an sawi.

Party hrang hrang pawhin J&K-a army camp beih an dem thu an sawi. Congress chuan pawikhawihtute leh he thila inhnamhnawihte chu na taka hrem an nih ngei an beisei thu a sawi a, Congress President Sonia Gandhi chuan firfiakte chet dan chu mi dawihzep chet dan a ni tiin, firfiakte beihna avanga sipaiten nunna an chan chu pawi a tih thu a sawi. Congress vice president Rahul Gandhi pawhin Uri-a army base beih a nih chu a dem thu awiin, thi chhungte a tawrhpui thu a sawi bawk.

CPI(M) Central Committee chuan pawikhawihna thleng chu an dem thu sawiin, Pakistan chu firfiakte ṭanpui leh thlawp tawh lo turin a ngen. Party General Secretary Sitaram Yechury chuan Paksitan chuan ramri kaltlanga firfiak a tirh luh ṭhin a tihtawp a ngai a ni, a ti.

Hetihlai hian Pakistan chuan Uri-a Indian army beih a nih chungchangah an ram inhnamhnawih anga puhna chu an pawm lo tih a sawi. Pakistan foregin ministry thupuangtu, Nafees Zakaria chuan, "Pawikhawihna a thlen hnuah engmah chhui chian a nih hmain India chuan a mawhphurtuah Pakistan a puh nghal a, hei hi kan pawm lo a ni" a ti. Ramri kaltlanga firfiakte pawikhawihna thlengah Pakistan chuan inrawlhna a nei ngai lo niin a sawi.