UN hotu-in army camp beih dem

United Nations Secretary General Ban Ki-moon chuan firfiakte'n Pathianni-a Jammu and Kashmir-a Indian Army camp an bei chu a dem thu a sawi a, sipai thi chhungte leh India sorkar a tawrhpui thu a sawi. Hliam tuarte pawh ṭha taka an dam leh theihna turin duhsakna a hlan nghal bawk.

Pathianni khan J&K-a Uri biala army camp chu firfiakte'n luhkhungin an bei a, sipai 17 an thi a, mi dang eng emaw zatin hliam an tuar. Nimin khan hliam tuar zinga pakhat a thi leh a, firfiakte beihna vanga thi hi 18 an tling ta a ni. Camp beitu firfiak pali-te chu sipaite'n an kaphlum ve nghal a ni. UN hotu chuan pawikhawihna thenga inhnamhnawihte chu hriatchhuah a, an phu ang hremna pek ngei a duh thu a sawi.

UK Foreign Minister Boris Johnson pawhin Pathianni khan External Affairs Minister Sushma Swaraj-i chu biain, army camp beih a ni chu a dem thu leh, firfiakte do letna kawngah India chu a thlawp tlat thu a hrilh.

Nimin khan J&K Chief Minister Mehbooba Mufti-i hoin camp beihnaa sipai thi thlahna inkhawm hi Badambigah-a Chinar Crops headquarters-ah neih a ni a, army leh police official-te an tel a, sipai thi te kuangah zahna pangpar an dah. Inkhawm neih zawh hnu hian CM chuan sipai hliam tuar, 92 Base Hospital-a awmte chu a tlawh nghal bawk.

Jammu and Kashmir Governor NN Vohra leh CM Mufti-te chuan nimin tlai khan Raj Bhavan-ah security force leh intelligence agency hotute kawmin, an state chhung security dinhmunte an sawi dun. Governor hian Northern Command chief Lt Gen D S Hooda leh Chinar Corps commander Lt Gen Satish Dua-te chu biain, firfiakte kuta sipaite'n nunna an chan chu a tawrhpui thu a hrilh a, ram tana nunna hlantu sipaite zahna a hlan bawk a ni.

Sipai 17-te ruang hi an khaw lamah thawn nghal an ni. An zinga pahnih hi Jammu and Kashmir state ami an ni a, Uttar Pradesh mi pali, Bihar mi pathum, Mahrashtra mi pathum, West Bengal leh Jharkhand-ah pahnih ve ve leh Rajasthan mi pakhatte an ni.

Army camp beih a nih hnu hian Defence Minister Manohar Parrikar leh Army chief Dalbir Singh-te chuan Jammu and Kashmir hi a pan nghal. Parrikar chuan sipaite chu pawikhawihnaa inhnamhnawihte na taka bei let turin a hrilh a, sipai 17-te thihna chu a thlawn dawn lo tih a sawi. Camp beihnaa sipai hliam tuarte pawh a tlawh nghal a, enkawlna ṭha thei ang ber pe turin thuneitute a hrilh.

Parrikar hi Delhi-a a kir hnuah nimin zing khan Prime Minister Narendra Modi, Home Minister Rajnath Singh leh Finance Minister Arun Jaitley-te nen meeting an nei a ni. Rajnath Sing chuan a hranin Parrikar leh Dalbir Singh te a kawm bawk.

Nimin vek khan PM chuan Uri-a sipaite beihna thleng chungchangah hian high level meeting a ko a, security lam official-te leh minister pawimawhte an tel. Pawikhawihna thlenna hmunah hian National Investigation Agency team tirh an ni dawn bawk.