Delhi Deputy CM pen tuiin theh

Delhi Deputy Chief Minister Manish Sisodia chu nimina Lieutenant General Najeen Jung nena meeting an nei zo a haw lam chu LG chenna kawtah mi pakhatin pentuiin a lo theh.

Pen tuia thehtu hi Brajesh nia sawi a ni a, Delhi khawpuiin dengue leh chikungunya hri leng vang harsatna a tawrh mek laia ram pawn lama a lo zin bo avangin Deputy CM hi a bei niin a sawi. "Hruaitute ram danga an zinbo hlanin Delhi mipuite chu mangang takin an awm a ni" a ti.

Hetihlai hian Sisodia chuan Aam Aadmi Party sorkarin Delhi khawpui tana a hnathawhte hai derin, eptute chu mipui rilru hruaikawi tumah a puh.

Education department changtu ni bawk, Sisodia hi Finland-a education conference hmanga a zin chu LG chuan haw turin a ko a, hei vang hian a cham hun tur pawh pawttawiin Pathianni khan Delhi a thleng a ni. Eptuten Finland-ah chawlh a hmang nia an puhna chu chhangin, Sisodia chuan "Delhi education system buaina siamṭhat dan kawng zawng a, ram dangte zirna kalpui dan sytem zirchiang tura zin chu thil sual a ni lo" a ti.

Delhi Chief Minister Arvind Kejirwal-a chuan khawpui chhunga dengue leh chikungunya hri leng mek do let turin Delhi mipuite chu thosi laka indo puang turin a sawm. Video hmanga thuchah a tihchhuahah, CM chuan hri leng mek dang tur hian Delhi sorkar, sorkar laipui leh BJP rorelna, municipal corporation-te chu thosi puang tur venga an thawhho a ngai tih a sawi.

A hrawk na avanga Bengaluru-a inenkawl mek, Kejriwal-a chuan thosi vanga hri leng chungchang politics lama inbeihna atana hman a ni chu pawi a tih thu sawiin, Health Minister Satyender Jain hennah thla khat leh a chanve chhung chu theihtawpa thosi tirem tura beihpui thlak turin a hrilh tih a sawi. "Thosi chuan BJP leh Congress te a thliar hrang lo a, hei vang hian kan vaia kan ṭanho a ngai a ni" a ti.