Cauvery Supervisory Committee meeting nei

Karnataka leh Tamil Nadu-in Cauvery lui tui an inchuh chung≠chang ngaihtuahin, nimin khan Cauvery Supervisory Committee meeting neih a ni. Meeting-ah hian Tamil Nadu leh state dang tana Cauvery tui pek zat turte an rel a ni.

Meeting neih dawn vang hian Karnataka state chhung hmun hrang hrangah venhimna tihkhauh a ni a, meeting thurel dana lungawi lo awmte'n buaina an chawh chhuah venthawn thilah khawpui lian zualahte police ṭhahnem tak duty tir an ni. Tamil Nadu nena an inrina, Bengaluru Rural leh Kolar district-ahte RAF leh BSF duty tir an ni.

September 15 khan Supreme Court chuan state pahnih sorkar chu Cauvery tui inchuh chungchanga state chhunga tharum thawhna thleng chungchangah a khak a, an buainate chu chingfel thuai turin a hrilh bawk.

Committee hian September 12 khan meeting a lo nei tawh a, mahse he meeting-a lui tui insem dan tura rawtna a siam chu Tamil Nadu leh Karnataka sorkar hian an pawm thei lo ve ve a ni. Hemi ṭuma meeting-ah hian Karnataka, Tamil Nadu, Puducherry chief secretary-te bakah Kerala senior official-te an tel.

Cauvery lui tui hi kum tam tak an inchuh buai tawh a, sorkar laipuiin kum 1990-a a din Cauvery Water Tribunal chuan state pahnihte thu a ngaihthlak hnuah kum 2027 khan lui tui insem dan tura thutlukna siamin, Tamil Nadu chu tmc ft 419 leh Karnataka chu tmc ft 270 chang turin a ti a, Kerala chu mfc ft 30 leh Puducherry chu tmc ft 7 dawng turin a re bawk. Mahse tribunal thutlukna siam hi Tamil Nadu leh Karnataka sorkar chuan Supreme Court-ah an khing let ve ve a ni.