Covid vaccine a thlawnin pe vek dawn : Union minister

Union minister Pratap Sarangin chuan India ram mipuite hnenah Covid-19 vaccine a thlawn veka pek a ni dawn tih a sawi. 

BJP chuan Bihar inthlan neih tur atana an party manifesto-ah thlan tlin an nih chuan state mipuite chu Covid-19 vaccine a thlawna pek vek an tiam. Hei hian sawizui a hlawh hle a, eptu party-te chuan hripui leng mek chu politics khelhna atana hmangah an puh a ni. 

Inthlanna neihna tur state-ah chauh ni lo, ram pumah a thlawna vaccine hi sem turin an phut a ni.

 

Hemi hnu hian union minister chuan Odisha-a by-election neihna tura a campaignaah, prime minister Narendra Modi chuan India ram mipuite hnenah a thlawn vekin Covid-19 vaccine pek a ni dawn tih a puang tih a sawi  a ni. 

Minister chuan mi pakhatah vaccine pekna atan hian Rs 500 zel seng tur anga chhut a nih thu a sawi bawk.

October 20 khan PM Modi chuan India scientist-ten Covid-19 vaccine hmuh chhuah tumin theihtawp an chhuak mek thu a sawi a, vaccine hmuhchhuah kawngah hian a hmasawn zawnga India chu a kal mek thu pawh a sawi bawk. 

Tamil Nadu, Madhya Pradesh, Assam leh Pudu­chery sorkar chuan Covid-19 vaccine peihfel a nih hnuah an state mite chu a thlawna pek an ni dawn tih an lo puang tawh bawk. 

Delhi CM Arvind Kejriwal pawhin Covid-19 vaccine chu India ram pumah a thlawna sem a nih theih nan sorkar laipui a lo ngen tawh bawk a ni.