Ram pakhatin flag pahnih a nei thei lo: BJP

Jammu and Kashmir chief minister hlui Mehbooba Mufti-in Article 370 hmanga J&K flag pek let an nih leh hma loh chuan India hnam flag a pawtphar tawh ngai lo ang, tia a sawi chu BJP chuan a chhang let. 

Union law minister Ravi Shankar Prasad chuan Mufti thusawi duh dan chu anti-national a ni tiin,  India hnam puanzar chungchang zah lo taka a sawi avanga a dem thu a sawi. Ram pakhatin flag pahnih an nei thei lo, a ti. 

Prasad chuan, "Tricolour hi India national flag a ni a, J&K chu India ram a ni. Article 370 chu ram danpui kalphung ang thlapa tihbo a ni a, Parliament in hnihah pawh pawm a ni bawk. J&K-ah pawh rorelna mumal tak a awm tawh a, firfiaka chetna thlengte pawh na taka beih let niin, mipuite pawh an hlim tawh a ni," tiin a sawi. 

J&K hnenah Article 370 chu pek let an ni tawh dawn lo a, tihtawp vek a ni tawh tiin Prasad chuan a sawi a, ram pakhatin symbol pahnih, hotu lu ber pahnih an nei thei lo a, flag pahnih a awm thei ngai lo, a ti. Mufti thusawi chungchang an chhan let loh avangin eptu party dangte pawh a sawisel zui bawk. 

People's Democratic Party (PDP) hotu Mufti hian kar liam ta Zirtawpni khan nikum August 5-a central-a BJP kaihhruai sorkarin Jammu and Kashmir special status a pekna, Article 370 a tihtawp chu pek kir leh an nih hma chuan inthlanna chuh emaw, national flag pawhpharh leh emaw chakna a nei lo tih a sawi. Article 370 tihtawp a nih hnu hian J&K political leader eng emaw zat chu pawn chhuak thei loa hren nghal niin, Mufti pawh hi  kumkhat chuang hren a ni hman. 

J&K-a party hrang hrang chuan tun hnaiah ṭangrual pawl, "People's Alliance for Gupkar Declaration" dinin, Article 370 an neih let leh theih­na atana beih an tum tih an sawi.