Nakkum February hmain board exam awm dawn lo

Union education minister Ramesh Pokhriyal ‘Nishank’ chuan Thawhlehni khan Central Board of Secondary Education (CBSE) Class X leh Class XII examination chu nakkum February hnu lama neih tum a nih thu a sawi.

A pangngai ang chuan board exam hi January thlaah practical exam neih thin a ni a, February thlaah hian theory exam a ni thin.

Thawhlehni khan minister leh zirtirtute chuan virtual hmangin meeting an nei a, he hunah hian minister chuan Covid-19 vangin exam hun tur hi puan chian theih a la nih loh thu a sawi. 

Meeting neihnaah hian minister chuan online hmanga exam buatsaih a remchan loh thu a sawi a, a theih ang angin zirlai te chu online hmanga class pek thin an nih thu pawh sawiin, zirlai zawng zawngin computer leh Internet tha an neih vek loh avangin online hmanga exam neih chu a rem lo tiin a sawi. Exam dan tur chungchangah hian sorkar chuan theihtawpin hma a la mek a, sorkar hmalakna leh ruahmanna chu hriat thuai a nih theih a beisei thu minister chuan a sawi bawk.

CBSE chuan nakkuma board exam tur hi written mode a exam tur a nih thu a lo puang tawh a ni. Covid-19 hri leng vangin kumin March thla atang khan school khar a ni a, October 15 atang khan state thenkhatah chuan zirna inte hawn a ni.