Union minister hlui Dilip Ray kum thum tang turin hrem

Union minister hlui Dilip Ray chu coal scam case chungchangah thiam loh chantir a nih tawh hnuin, nimin khan Delhi-a Central Bureau of Investigation (CBI) court  chuan kum thum chhung jail tang turin a hrem. 

Ray bakah hian Ministry of Coal-a senior official hlui pahnih, Pradip Kumar Banerjee leh Nitya Nand Gautam bakah Castron Technologies Ltd (CTL) director Mahendra Kumar Agarwalla-te pawh kum thum chhung tang tura hrem an ni bawk. 

October 7 khan Delhi-a special court chuan Ray hi coal scam case-ah hian thiam loh a lo chantir tawh a, hemi ṭum hian Pradip Kumar Banerjee, Nitya Nand Gautam leh Mahendra Kumar Agarwalla-te pawh chu thiam loh chantir an lo ni tawh bawk. 

Court chuan thiam loh chantirte hi kum thum tang tura a tih bakah, Rs nuai 10 ṭheuh chawi turin a ti bawk a ni.

Kum 1999-a Jharkhand-a dik lo taka coal block inpek chung changah Ray leh midangte hi thubuai siamsak an ni. Ray hi prime minister hlui Atal Bihari Vajpayee hun laia Minister of State (coal) a ni ṭhin.  

CBI court chuan minister hlui Ray leh midangte bail dilna hi a pawmsak bawk a, November 25 thleng hremna pek an nih chung chang hi High court-a appeal a phalsak bawk.