ACB-in DWC hotu Maliwal-i lakah FIR thehlut

Anti-Corruption Branch (ACB) chuan Delhi Commission for Women (DCW) hotu Swati Maliwal-i chu dik lo taka hnathawktu tur laa puhin a lakah FIR a thehlut.

ACB hian Thawhṭanni khan Swati Maliwal-i hi darkar hnih chhung zet thu a zawtfiah a, hemi hnu hian FIR hi a thehlut zui ta a ni. FIR hi Prevention of Corruption Act hnuaiah ziahluh a ni.

DCW hotu hlui Barkha Shuka Singh chuan ACB-ah hian complaint thehlutin, Maliwal-i hian panel-a post ṭha tak tak chu dan loin Aam Aadmi Party (AAP) member-te a pe niin a sawi. Thawhṭanni khan ACB officer panga awmna team chu DCW office-ah kalin, Maliwal-i hi zawhna hrang hrang chhan tur an pe a, kar khat chhunga a chhanna thehlut turin an ti bawk.

Singh hian ACB-a complaint a thehluah hian Maliwal-in dik lo taka hna thawk tura lak nia a sawi mi 85 hming pawh a ziaklang bawk.

Maliwal-i chuan, "Zawhna chhan tur 27 min pe a, a chhan nan kar khat hun min pe a ni. Women's panel atana appointment tam tak kan siam theih dan min zawt a, a dik tak chu an zawhna awmzi hi a engtinnge hetianga nasa hian hna kan thawh theih tihna tluk a ni" a ti. ACB in chhui chian a tumna chu aw chhuah thei lo tura women's panel siam tumna niin a sawi.

DCW hotu chuan, "Kum khat chhung thubuai 11,500 kan chingfel a, helpline number 181-ah call nuai 2.25 kan buaipui bawk. DWC hotu hlui khan thubuai pakhat chiah a chingfel a ni. Khawpui chhunga pawngsualna a thlenin DWC hian aw kan chhuah nghal vat a, hei hian mi tam tak a tilungawi lo a, mahse kan ti chhunzawm zel dawn a ni", a ti.

ACB in zawhna chhan tur a pek chu kar khat chhungin ṭha tak a chhanna pek a tumthu leh, an chhuina kawngah pawh thawhpui a, document ṭul leh pawimawhte pawh pek vek a tum thu a sawi. Maliwal-i chuan Singh chu DCW hotu a nih laiin member turte pawh a ruat a, mahse kum riat chhungin thubuai pakhat chiah an buaipui thei niin a sawi. DCW hotu hna a chelh hnua hna lakte reng reng chu dan dik tak hmanga lak an ni a, tumah duhsak bik an nei lo tih a sawi bawk.

Delhi Chief Minister Arvind Kejriwal-a chuan Delhi sorkarin thutlukna a lo siam tawh hrang hrangte chu Prime Minister Narendra Modi chuan Lieutenant Governor Najeeb Jung-a kaltlangin thlak danglam a tum reng tih a sawi a, heng zingah hian DWC hotu Swati Maliwal thlak pawh an tum niin thla hmasa khan a lo sawi tawh a ni. LG leh PM chuan Maliwal-i chu hna a thawh ṭhat avangin paihthlak an duh a, an la man tir thuai a rin thu pawh a lo sawilang tawh a ni.