Singur-a Tata Motors hmun ṭhiat

West Bengal sorkar chuan Tata Motors-in Singur-a Gopalnagar sector-a Nano car factory atana kum 2006-a a lo siam chu a ṭhiat ṭan ta.

Tata Motors hian an factory hi chhuahsanin Gujarat-ah an sawn tawh a ni. Supreme Court chuan August 31 khan Tata Motors hnena ram pek chu kar 12 chhung ngeiin a ram neitu dik tak, loneitute hnenah pek kir leh turin state sorkar a lo hriattir tawh a ni.

District official chuan PWD official, DM, SP leh official dangte awm laiin Tata Motor plant ṭhiah hna chu ṭan a nih thu a sawi a, ngawrh taka thawh chhunzawm a ni dawn tih a sawi. Vawiin aṭang hian plant ṭhiah hna thawh hi Chief Minister Mamata Banerjee-i'n a tirh angin Parliamentary Minister Partha Chatterjee chuan a enpui ṭhin ang.

CM Banerjee chuan kar hmasa khan ram neitu, loneitute hnena cheque leh ram neitu nihna document a hlan tawh a, hemirual hian an state-a auto firm din duhte chu an lo lawm reng tih a sawi bawk. Industry din duhte tan an state chu a inhawng reng a, mahse tihluihna hmanga ram laksak erawh a kaihhruai sorkar chuan a remti dawn lo tih a sawi.