Army camp beihna chhuitu NIA-in FIR ziak lut

Firfiakte'n Jammu and Kashmir-a Uri sector-a army headquarters beih chungchang chhuitu, National Investigation Agency (NIA) chuan nimin khan FIR an ziaklut.

Army camp beitu firfiak pali-te hi kahhlum an ni a, an taksaah hian silai mu 169 zet a lut a ni. Firfiak pali-te hi kum 20 bawr vel an ni a, security duty-te an paltlang theihna turin sipai lumeh angin an sam pawh an met a ni. Pakistan siam damdawi pawh an keng tih hmuh≠chhuah a ni bawk.

NIA chuan sipaite'n firfiakte ruang aṭanga an ralthuam ken an hmuhte chu a endik mek. Thuchhuah siamin, firfiak pali-te ruang aṭang hian AK-47 rifle pali, magazine 14, silai mu 318, UBGL grenade 29 leh hand grenade 5, GPS device 2, navigation map 2, matrix sheet 1, mobile phone 1 leh damdawi leh ei turte hmuh a ni tih a sawi. GPS device leh firfiakte kutzia bakah an thisen sample aṭang hian Pakistan-a an rawn kal chhuahna chu chhui chhuah theih beisei a ni tih a tarlang.

GPS device leh satellite chu US-a forensic mithiamte enfiah turin thawn a ni dawn a, heta ṭang hian firfiakte hian khawi kawng nge an rawn zawh tih leh, India rama an rawn luh ruk theih dante hriat≠chhuah theih a ni ang.