Pakistan PM-in US puihna ngen

Pakistan Prime Minister Nawaz Sharif-a chuan Kashmir chungchanga India leh Pakistan buaina chu chinfel pui turin US a ngen.

New York-a 71st UN General Assembly session hmanga zin, Pakistan PM hian Thawhṭanni khan US Secretary of State John Kerry hmuin, Kashmir chung≠chang hi chinfel pui turin a sawm a ni.

Sharif-a chuan US President hlui Bill Clinton-a'n India leh Pakistan buaina neihte chinfel pui a, inzawmna ṭha an neih theih nan US chuan puih a inhuam reng thu a sawi pawh a la hrereng tih a sawilang. Hei vang hian US sorkar leh Secretary Kerry-te chuan theihtawp an chhuahpui a beisei tih a sawi.

Meeting an neihnaah hian Pakistan Foreign Affairs Advisor Sartaj Aziz, Special Assistant on Foreign Affairs Syed Tariq Fatemi leh Foreign Secretary Aizaz Ahmed Chaudhry-te pawh an tel. Sharif-a hian vawiin hian General Assembly session-ah thu a sawi dawn a, Jammu and Kashmir chungchang hi a thlurbing dawn a ni.