Karnataka CM-in all party meet a ko

Cauvery lui tui inchuh vanga Karnataka leh Tamil Nadu state buaina kal zelah, nimin khan Karnataka Chief Minister Siddaramaiah chuan all-party meet a ko. Hetih lai hian loneitute chuan state chhung hmun hrang hrangah nawrh an la huaihawt chhunzawm reng a ni.

All party meet hi Karnatak-a party lian pahnih, BJP leh JD-S chuan a boycott thung.

Meeting-ah hian an state-a parliament member, union minister, state minister te an tel a, Cauvery lui tui insem dan tur chungchanga Supreme Court-in thupek a tihchhuah avanga state chhunga buaina thleng mek chinfel dante an ngaihtuah.

September 12 khan Supreme Court chuan Karnataka state hnenah Cauvery tui chu a
ṭhenawm, Tamil Nadu state tan nitin cusec 12,000, ni 10 chhung pe turin a lo hriattir tawh a, court thupek zawmin Thawhlehni khan an tui pek tur hi an pe tlak a ni. Mahse ni 10 a ral hnuah, Supreme Court division bench chuan September 27 thleng nitin cusecs 6,000 pe chhunzawm turin Thawhlehni khan a hriattir leh a ni. September 27 khian hemi chungchang hi ngaihtuah ṭhat leh a ni ang.

CM Siddarmaiah chuan an state ngei pawhin ruahtui a tlak ṭhat loh avangin tui lamah harsatna nasa tak an tawk ve mek tih a sawi a, hemi rual hian court thupek vanga lungawi loa nawrh huaihawtte chu buaina chawk chhuak lo turin a ngen. An state mipui, a bikin loneitute ṭhatna tur chu an ngaihtuah dawn tih a sawi a, sorkar thawhpui turin mipuite a ngen bawk.

Siddarmaiah chuan tui in tur pawh duhkhawp tui an ngah loh laia, Cauvery lui tui pe chhuak tura Surpreme Court thupek siam chu zawm harsa tak a nih thu a sawi.