Uri camp beitu JeM hel an ni : Indian Army

Indian Army chuan Pathianni-a Jammu and Kashmir-a Uri khuaa army headquarters beitu chu Pakistan-a inkhuar, Jaish-e-Mohammad helpawl member te an nih thu a sawi. Army camp beihnaah hian sipai 18 an thi a ni.

Lieutenant-General Ranbir Singh chuan, "Army camp beitu firfiak pali-te chu thah vek an ni a, Pakistan chhinchhiahna awm thil eng emaw an keng bawk a ni" a ti.

Investigator-te chuan Uri beih a nih dan leh, 12 Infantry Brigaide-a firfiak pali-te an luh theih dan chu ngawrh takin an chhui mek a, an chhuina aṭangin an pali hian Jaish pawl mi ngei nia an lan thu an sawi. National Investigation Agency (NIA) pawhin sipai camp beih a nih dan hi an chhui mek bawk.

JeM hi kum 2001 December 13-a New Delhi-a Parliament building beitu nia puh an ni bawk a, sorkar laipui chuan kum 2001, October 25 khan Prevetion of Terrorism Act (POTA) hnuaiah an pawl hi dan pawnah a lo hnawl tawh a ni.

Uri army camp beihnaah hian JeM hotu, Masood Azhar leh an pawl hruiatu dang, Kashif Jann leh Rauf Asgar-te chu a bul tumtu ber nia rin an ni. Kashif Jaa hian kumin kumtira Pathankot air base beitu firfiakte kha Pakistan ṭangin ramri thlengin a rawn kalpui a ni.

NIA chuan Uri beitute hriatchhuah an nih theih nan hian firfiak Lashkar-e-Toiba mi leh sa, Bahadur Ali chu thu zawhfiah a tum. Ali hi kumin July thla khan man a ni. Security force-te'n a kut aṭanga an thil mansakte chu Uri army camp beitute thil ken nen a inan avangin inzawmna an nei nia rin a ni. NIA hian army camp beitute thil ken, ICOM set, matrix-codded sheet leh Pashto lehkhabu te an man a ni. NIA chuan Ali hi Kashmir Valley tualchhung buaina thleng mek remchangah hmang a, buaina tipunlun tura pawikhawihna then turin, Pakistan-ah military expert-te'n training an pe niin a sawi.