SAARC Summit aṭangin India inhnukdawk

Pakistan firfiakten Jammu and Kashmir-a Uri army camp an beih hnuah, Pakistan khawpui Islamabad-a South Asian Association for Regional Cooperation (SAARC) Summit neih tur aṭangin India a inhnukdawk a, hemi hnu lawk hian Afghanistan, Bangladesh leh Bhutan ram pawh an inhnukdawk ve leh.

Prime Minister Narendra Modi chuan Thawhlehni khan SAARC Summit hi India in a boycott dawn tih a sawi. Summit vawi 19-na hi November 9-10 hian Pakistan khawpuiah neih tura ruahman a ni. SAARC-ah hian member ram pariat - Afghanistan, Bangladesh, Bhutan, India, Nepal, the Maldives, Pakistan leh Sri Lanka an awm.

Ministry of External Affairs chuan thuchhuah siamin,"India chuan SAARC Chair Nepal hnenah ramri kaltlanga firfiakte pawikhawihna thleng ṭhin leh, member ramte ram≠chhung inrelbawlnaa inrawlhna a awm avangin Islamabad-a summit neih chu a hlawhtling thei dawn loah a ngai a ni" a ti.

PM-in SAARC Summit-a India a telh loh tur thu a sawi hnu hian Afghanistan, Bangladesh leh Bhutan pawhin an tel dawn lo tih an sawi a ni. Ram pali-te'n an tel dawn loh thu an sawi tak avangin summit neih tur pawh hi ṭhulh a ni maithei nia sawi a ni.

Bangladesh chuan member ramte thawhhona ṭha leh inpawh tlanna a duh a, hetiang boruak hnuaiah hian summit hlawhtling tak a awm thei dawn chauh a ni tiin, boruak awm dan chu ṭhat loh avangin summit-ah chuan a tel ve thei dawn lo tih a sawi.

Bhutan pawhin SAARC hmasawnna leh inpumkhatna
ṭha siam chu a duh ber tih sawiin, tunhnaia firfiakte chetna hluar chho zel chuan summit hlawhtlinna tur hi a hliahkhuh vek a ni, a ti. Member ram
ṭhenkhatten SAARC ram huam chhungah firfiakte avangin muanna leh security dinhmun a tlahniam nia an sawi pawh chu ngaihthah mai chi nia a ngaih loh thu a sawi bawk.