Kashmir: Kulgam district-ah curfew puang leh

Jammu and Kashmir-a Kashmir Valley buainain ziaawm lam a pan avanga khaw hrang hranga curfew puan chu hlih a nih hnuah, inlakhran duhtuten kawngzawh huaihawt an tum leh avangin nimin khan Kulgam district-a Koimoh khuaah curfew puan leh a ni.

Police office-te chuan Koimoh khuaah kawngzawh huaihawt tum a nih avangin buaina a chhuah palh venthawn thilah, dan leh thupek khauh zawka kenkawh a nih theih nan curfew hi puan a ni tih a sawi.

India aṭanga inlakhran duhtute chuan Kashmir-ah hian nawrh an huaihawt reng a, khaw hrang hrangah kawngzawh an neih turah tel turin mipuite an sawm.

Tualchhung buaina chhuakin ziaawm lam pan tawh mah se, inlakhran duhtuten nawrh an huaihawt chhunzawm reng avang hian Kashmir Valley nunphung hi ni 82 chhung zet tihkhailak a ni tawh. Mahse nimin khan nawrh an huaihawt chungin private motor eng emaw zat chu an tlanchhuak a ni. School, college leh zirna in dangte chu khar chhunzawm a la ni a, dawr, petrol pump leh sumdawnna hmunte pawh a la inkhar bawk.