Karnataka-in Cauvery lui tui pe chhuak tlai dawn

Karnataka sorkar chuan Supreme Court-in Tamil Nadu state tana Cauvery lui tui, September 27 thleng nitin cusec 6,000 pechhuak turin hriattir mah se, a pek hun tur a tikhawtlai.

Supreme Court thupek duh loh hian state chhung hmun hrang hrangah lungawi lohna lantir a ni a, Chief Minister Siddarmaiah pawhin Nilaini khan all party meeting a ko a ni.

All party meeting neih hma hian cabinet meeting neih a ni bawk a, meeting chuan Tamil Nadu hnenah hian vawiin thlengin tui hi pek chhuah rih loh an rel a, vawiin vek hian hemi chungchang ngaihtuahin assembly special session neih a ni ang.

September 5 khan Supreme Court chuan ni 10 chhung chu Tamil Nadu hnenah hian nitin tui cusecs 15,000 pe turin a ti a, a hnuah cusecs 12,000 ah a tihhniam sak leh a ni. September 19 khan Cauvery Supervisory Committee chuan Karnataka hnenah hian September 20-30 chhung nitin cusecs 3,000 pek belh leh turin a ngen. Thawhlehni khan Supreme Court chuan hemi chungchang hi ngaihtuahin, tui pek tura tih zat a let, cusecs 6,000-ah tipungin, September 21-27 chhung pe turin a ti a ni.

Karnataka CM Siddarmaiah chuan SC thupek siam thar chu an state tan kaltlangpui theih a ni lo tih sawiin, all party meeting a koh phah a ni. Mahse he meeting hi eptu party BJP chuan a boycott thung.