Uri beihna chhuinaah India thawhpui turin Pakistan ngen

US State Department chuan firfiakte'n Jammu and Kashmir-a, Uri khuaa army camp an beih chungchang chhui hna thawh mekah India chu ṭha taka thawhpui turin Pakistan a ngen.

US Secretary of State John Kerry chuan, New York-a UN General Assembly neih mekah Pakistan Prime Minister Nawaz Sharif-a hmuin, Uri camp beih chungchang hi an sawidun. Secretary chuan Pakistan chu pawikhawihtu zawn-chhuah an nih ngei theih nana theihtawp chhuahpui turin a ngen.

US chuan army beihnaa inhnam-hnawihte chungchangah information pek hun la ngaichang mek a, India chu puih a inhuam reng thu a sawi bawk.

Hetihlai hian sorkar laipui chuan Kashmir hmarlama Pakistan ramri, Line of Control (LoC) ah sipai brigade hnih a dah belh. Heng sipaite hi Udhampur leh Dharamsal-ah dah an ni. Brigade khatah hian unit pathum awmin, unit tinah hian sipai 800 chuang an awm.

Uri camp beitu firfiak pali-te hi Pakistan aṭanga kal nia sawi a ni a, sipaite chuan an pali hian an kaphlum a ni. Hetihlai hian firfiak eng emaw zat chu India ramah rawn luh ruk tumin, hun remchang an nghak mek niin intelligence agency-te chuan an sawi. Heng mite hi international border aṭanga km 200 vela hlaah an awm a, mi 40-50 vel nia sawi a ni.