Security guard-te kutthlak vangin AAP MLA man

Delhi-a rorellai, Aam Aadmi Party (AAP) MLA Somnath Bharti chu tun thla tir lama, All India Institute of Medical Sciences (AIIMS) hospital security guard-te kut a thlak avangin nimin khan man a ni. Vantlang thil tichhiaah puh a ni bawk.

Somnath Bharti-a nupui chuan nikum khan kut a thlak ṭhin nia sawiin, a pasal lakah complaint thehlutin Bharti-a hi man a lo ni tawh a, bail-in a chhuak mek a ni.

AIIMS chuan Bharti-a lakah hian complaint thehlutin, September 6 khan Bharti-a leh a zuitu mi 27-te chuan hospital security guard-te kut an thlak niin an sawi a, hopistal hungna bang an tichhe tel bawk niin an sawi. Hetianga an chetna chhan hi phalna nei lote AIIMS compound chhunga luhtir an tum vang a ni, a ti.

Bharti chuan an puhna chu thu dik lo a ni tih a sawi a, AIIMS chuan phalna nei ngeite pawh an luh a phalsak lo niin a sawi thung.

AAP sorkar hmasaah khan Bharti-a hi law minister a ni a, mahse minister a nih lai hian a chetdan avangin sawisel a tawk nasa hle a, zanlaia Nigeria hmeichhiate chenna hmun dap leh, kut thlak an nihnaah pawh a hmahruaitu ber nia puh a ni.