Khawvel huap sum la lut tam ni turin India economy ṭhanna 7.8% a nih a ngai

India chu kum 2000 aṭanga ram economy ṭhangduang ber a nih bakah, khawvel huapin economy lian ber pangana dinhmun a hauh mek. Hetih lai hian kum 2047-a khawvel hupa sum la lut tam, high-income country ni pha tur chuan kumtin economy ṭhanna hi 7.8% a tlin a ngai niin World Bank chuan a tarlang.

India GDP hi a let thuma pungin kum 2000-a global economy-ah 1.6% share a neih chu 2023-ah 3.4% a kai thei a ni.

World Bank-in Zirtawpni liam taa report a tih chhuahah, India-in khawvel huapa sum la lut tam ram a nih theihna tur hian financial sector, land, leh labour market aṭangin insiamthar a mamawh dawn niin a tarlang. World Bank-in India chungchanga a report siam hi ‘Becoming a High-Income Economy in a Generation’ tih niin kum 2000-2024 inkarah khan economy ṭhanna hi chawhrualin kumtin 6.3% a kai pha tih a tarlang.

India-in kum kalta chhunga hlawhtlinna a hmuh chuan hmalam hun a thiltum tih hlawhtlinna tur atan nghahchhan ṭha tak a siam niin World Bank chuan a sawi. Kum 2047-a India thil tum ti hlawh tling tur hian Chile, Korea, leh Poland te hlawhtlinna lo neih tawh, midlle aṭanga high income an rawn nih theih chhan, global market-a thawhhona ṭha neih chu India tih ve tur niin World Bank Country Director Auguste Tano Kouamé chuan a sawi.

Report-a India-in a hmachhawp a tih hlawhtlin theihna tura hmalak ngaihna tarlanah hian, state hrang hrang huam chhunga hmasawnna thlen, kum 2035 hmain GDP-a investment an tih ṭhin 33.5% aṭangin 40% a tlin, hnathawktu awm zat 65% a tih pun, leh thilsiam chhuah tih punte an ni.