Thla 3 chhungin ruihhlo awm lohna Punjab siam tum

Punjab chief minister Bhagwant Mann chuan Zirtawpni liamta khan state chhunga ruihhlo nuai bo a, thla thum chhunga ruihhlo awm lohna Punjab siam an tum thu a sawi. Ruihhlo do beihpui thlak hna hi state police mi leh sa 12,000 ten an thawk mek a ni.

State sorkarin high-level meeting an neih hnuah, Punjab police chuan state pumpuiah ruihlo do beihpui thlak hna hi an kalpui ṭan a, state chhung hmun 750-ah dapchhuah beihpui an thlak tawh.

Cabinet Sub-committee zinga member-te chu district hrang hranga ruihhlo zuarte laka police hmalaknate endik tura ruat an nih thu committee chuan a sawi. Member-te hian an endik tur bial hrang hrang sem an ni.

Cabinet minister Aman Arora chuan Inrinni liamta vek khan political party dangte pawh chu politics khelhna atana he hmalakna hi hmang lo turin a ngen. State sorkarin ruihhlo umbo tura a hmalaknaah thlawp leh thawhpui turin a chah bawk. Ruihhlo do beihpui thlaknaah hian hmun hrang hrang ah in leh lo dap a nih bakah hemi kaihhnawihah hian bungrua eng emaw zat chu tih chhiat a ni tawh a ni.